Birtaniya za ta Taimaka wa Saudiyya da Jirgin Yaki Mai Dakon Ma. London, Birtaniya (AFP) — Birtaniya ta amince da bai wa Saudiyya wani tallafin soji domin taimaka mata wajen tunkarar hare-haren da mayakan Houthi masu samun goyon bayan Iran daga Yemen ke kai mata, a wani mataki da gwamnatin Birtaniyar ta ce an ɗauka ne domin kare “tsaron ƙasa”. Gwamnatin Birtaniya ta tabbatar a daren Litinin cewa wani jirgin saman sojinta mai ɗaukar man fetur zai riƙa samar da man fetur ga jiragen yaƙin Saudiyya a sararin samaniya, domin taimaka wa ƙasar wajen kare kanta daga hare-haren Houthi. Matakin na nuna goyon bayan Birtaniya ga Saudiyya ne bayan ƙasar ta nemi tallafin soji, sakamakon ƙaruwa da hare-haren jirage marasa matuƙa da makamai masu linzami da Houthis ke kai mata a cikin ‘yan makonnin nan. A ranar Asabar ne aka kai wani hari kan birnin Riyadh, babban birnin Saudiyya, wanda ya kasance hari na farko da aka kai kan babban birnin cikin shekaru da dama, lamarin da ya ƙara tsananta rikicin. Ministan tsaron Birtaniya, Luke Pollard, ya shaida wa Sky News cewa.. “Muna yin hakan ne saboda dalilan tsaron ƙasa, domin tallafa wa tsaron ƙasarmu.” Ya ƙara da cewa, “A lokutan haɗari, abokai na kwarai suna tsayawa tare,” yana mai jaddada cewa tallafin zai kasance cikin bin dokokin ƙasa da ƙasa na jinƙai. Ana sa ran jirgin RAF Voyager, wanda yawanci ke sansanin sojin sama na RAF Akrotiri da ke Cyprus, zai fara aikin cikin ‘yan kwanaki. An ce aikin zai kasance na ɗan lokaci ne, kuma jami’ai sun nuna cewa zai iya ɗaukar makonni kaɗan. Jirgin zai riƙa ƙara wa jiragen yaƙin Typhoon da Birtaniya ta ƙera, waɗanda Saudiyya ke amfani da su, man fetur a sararin samaniya. Wannan tallafin ya zo ne ƙari kan tsarin kariyar sararin samaniya na Sky Sabre da Birtaniya ta riga ta girke a Saudiyya. Firaministan Birtaniya, Andy Burnham, ya sanar da sabon tallafin sojin ne a daren Litinin yayin da yake tafiya birnin New York domin halartar taron Majalisar Ɗinkin Duniya. Burnham zai gana da Ministan Harkokin Wajen Saudiyya, Yarima Faisal bin Farhan, a wani taro da za a gudanar a gefen babban taron.…